ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានប្រកាសនៅក្នុងទំព័រផេកផ្លូវការនៅព្រឹកថ្ងៃទី១២ ខែឧសភា ឆ្នាំ២០២៣ ថា សម្តេចវិជ្ជមានកូវីដ-១៩។ ប៉ុន្តែសម្តេចក្រឡាហោមថានៅតែអាចបំពេញការងារក្នុងគេហដ្ឋានដាច់ដោយឡែកបានជាធម្មតា។
សម្តេចក្រឡាហោម បានសរសេរដូច្នេះថា៖ «ខ្ញុំសូមជម្រាបជូនជនរួមជាតិសូមជ្រាបថា បន្ទាប់ពីអការៈសុខភាពខុសប្លែកពីធម្មតាបន្តិចបន្តួច ខ្ញុំបានធ្វើតេស្តរកឃើញថាមានវិជ្ជមានជំងឺកូវីដ-១៩។ ខ្ញុំក៏បានណែនាំក្រុមគ្រួសារ និងអ្នកនៅជុំវិញធ្វើតេស្ត និងតាមដានសុខភាពដូចគ្នាដែរ»។
តែយ៉ាងណា សម្តេចក្រឡាហោមបានដាក់ខ្លួននៅដាច់ដោយឡែកពីក្រុមគ្រួសារ និងធ្វើលំហាត់ប្រាណ។ សម្តេចថានៅតែអាចបំពេញការងារពីបន្ទប់ដាច់ដោយឡែកក្នុងគេហដ្ឋានបានជាធម្មតា។
សម្តេចក្រឡាហោម ស្នើសុំការអធ្យាស្រ័យសម្រាប់ការលុបចោល និងការអវត្តមានពីកម្មវិធីការងារនានាមួយររយៈពេលខ្លី។ សម្តេចក្រឡាហោមថ្លែងដូច្នេះថា៖«ខ្ញុំនឹងធ្វើបច្ចុប្បន្នភាពព័ត៌មានស្ដីអំពីបញ្ហាសុខភាពនេះតាមវិធានសុខាភិបាលជូនជនរួមជាតិរហូតបានជាសះស្បើយ»៕
